340 ungdomar har søkt om plass ved Nordfjord folkehøgskule til hausten. Og rekordstor søknad til skulen betyr rekordmange svarbrev. Vi har sortert og spekulert, pakka og frankert, og no er svarbreva på veg ut til alle dei nye elevane.

Onsdag 3.februar var det stor dugnad for å få ut alle breva. Odd Harald Inspektør og Per Lærar hadde kontrollen, og dei instruerte undersåttane sine med makt og mynde. Undersåttane var for anledninga elevar som av ymse årsaker ikkje kunne vere med på snøholetur, og desse viste seg å vere svært veleigna arbeidskraft. I alle konvoluttane skulle det vere eit offisielt svarbrev frå rektor, ei velkomstbrosjyre frå linjelærar, ein giro og ikkje minst ein DVD med filmar frå friluftslivskulen. Konsentrasjonen hos dei som pakka var til å ta og føle på, og vi håpar alle brev kom i rett konvolutt.

Vi har berre 115 skuleplassar på Nordfjord folkehøgskule. Og nesten 3 gongar så mange søkjarar. Det betyr at mange av søkjarane ikkje fekk opptaksbrev no i første runde, men i staden står på ei venteliste for å få plass ved skulen.